Les mots surlignés font l'objet d'une note
1Monsieur, je me treuvey hier, vingtroiziesme de ce moys, à Suze, où messieurs
2les consulz de Sainct-Pol et bailly, appourtèrent une lectre de vous à monsieur
3de Suze, par laquelle je veit quil vous avoyent faict entandre quilz avoyent
4estez cottizez sans estres appellez ; ce que je vous puys asseurer, monsieur,
5quilz vous ont adverty à faulx, comme verrez par le double de lacte que
6je vous envoye, vous suppliant croyre que je ne suys encore si mal
7advisé que davoir faict leur cottisation, laissant faire cela à messieurs
8les consulz de Pierrelatte, lesquelz recepvent et deslivrent ce quilz prirent
9des villaiges, sans que je m’en mesle en rien. Quant au denombrement
10des vivres, je vous en voye ung double de celluy que je leur ay bailhé,
11signé de ma main, surquoy, se sont faict les cottizations des feuz pour
12la forniture de la compaignie de mondict sieur de Suze, entre eulx,
13sans ce que je m’en soye en rien meslé, vous suppliant bien humblement,
14monsieur, croyre que je ne vouldrois faire chose qui me prejudiciast
15en rien de mon honneur, encor moings chose que je cogneisse vous
16desplaire pour vous estre très humble et affectionné serviteur. Quant
17au denombrement des vivres, sil est tropt excessif, vous me manderez
18ce quil vous plaira que jen suyve ; et en ce, je ne fauldrey vous hobeyr ;
19oultre ce, je leur ay offert par le commandement de mondit sieur de
20Suze, poyement de gré à gré suyvant lordonnance du roy, et de faire
21ensuyvre à ladite compaignie ung mesme poyement que les aultres
22compaignies qui sont en Daulphiné feroient, comme il appert par acte
23retiré rière moy. Je suys aussi esté adverty par monsieur de La
24Pierre qu’aviez heu des plainctes de moy et de ceulx de la compaignie
25de ce que je suys esté à Alexan et Chabeul, vous faisant entandre
26que je prenois aultant comme si toute la compaignie y heust esté,
27ce que je vous puys asseuré, monsieur, croyre que de tout cela
28y nen est rien, et que tant sen fault-il que je nay jamais
29faict prandre monition, sinon ainsi comme ilz arrivoyent ; le nombre
30estoit des gensdarmes qui arrivèrent avecq moy le vingt sixme
31de juilhet trois gensdarmes et trois archiers ; et le vingt huictiesme
32après dudit moys est arrivé deux gensdarmes et quatre archiers
33à Alexan et non aultres ; et en sont party le quinziesme daoust.
34Quant à Beaulmont, y ny a jamais esté lougez que deux gensdarmes
35et deux archiers. A Chabeul, ny a esté lougé que trois archiers,
36et à Chasteaudouble, ung. Et en cela, monsieur, vous puys-je
37[v°] asseuré quil est vray et qui na jamais esté bailhé monition que
38que pour ceulx qui y ont estez, et non pour aultres, comme
39je ferey tousjours apparoistre par actes du jour que je y
40suys arrivé et du jour que jen suys departy avecq toute
41la trouppe ; et vous supplie très humblement croyre que en
42quelque part que je soye, je me garderey bien de faire chose
43en quoy je puysse cognoistre que soit à la desobeissance du
44roy et de vous, auquel je vous veulx demeuré très humble
45serviteur daussi bon cueur que je prie notre seigneur,
46monsieur, vous donne heureuse prosperité et longue vye.
47De Pierrelatte, ce XXIIIIe aoust 1571
48Votre très humble et hobeissant serviteur
49Jehan de Chaste